Endamên Meclîsa Ciwanan a Partiya Wekhevî û Demokrasiyê ya Gelan (DEM Partî) Nesrîn Ozdemîr û Tûgba Çelîk, li ser Pêvajoya Aştî û Civaka Demokratîk axivîn. Endamên meclîsa ciwanan diyar kirin ku ew armanc dikin ku eniyeke ciwanan a berbiçavtir û rêxistinkirîtir li qadê biafirînin, û divê desthilat gavên berbiçav bavêje da ku pêvajo pêşve biçe.

 

Nesrîn Ozdemîrê got: "Wekî ciwan, em bawer dikin ku divê êdî gavên berbiçav bên avêtin û divê pêvajo bi awayekî cidîtir bê dîtin. Gaveke herî berbiçav a ku li ser vê bingehê divê bê avêtin, azadiya fizîkî ya Rêber (Abdullah Ocalan) e. Wekî ciwan, cidîbûn û biryardariya me di vê mijarê de dê berdewam bike. Em daxwaza xwe ya hevdîtina bi Rêber re careke din dubare dikin."

 

'DIVÊ EM XWEDÎ LI PÊVAJOYÊ DERKEVIN'

 

Nesrîn Ozdemîrê anî ziman ku ligel Pêvajoya Aştî û Civaka Demokratîk ew armanc dikin ku ciwanan birêxistin bikin û bi wan re bi hev re bixebitin û ew dixwazin ciwanan li ser vê bingehê ji bo qada siyasî amade bikin. Nesrin Ozdemîrê got: "Em hewl didin ku ciwanan bi rêya panel û atolyeyan amade bikin. Bê guman, kêmasî hene; ji ber ku qadên me ji ber gavên berbiçav ên ku nehatine avêtin sînordar û teng in. Em dixwazin ev berfireh bibe. Divê em xwedî li vê pêvajoyê derkevin. Divê em vê pêvajoyê bi awayê çêtirîn pêk bînin. Ji ber ku di vê pêvajoyê de mîsyona herî jêhatî ya ciwanan e."

 

AZADIYA FIZÎKÎ YA ABDULLAH OCALAN

 

Tûgba Çelîkê teqez kir ku pêvajo bêyî azadiya fizîkî ya Abdullah Ocalan nikare bidome û got: "Her çend Rêber bi gavên cidî nêzî pêvajoyê dibe jî, mixabin, me hîn gavên ewqas cidî ji dewletê nedîtine. Ji ber vê yekê, em destpêka gavên cidî wekî azadiya Rêber, berdana girtiyên siyasî û vegera hevalên xwe yên li sirgûnê dibînin. Tê dîtin ku ev gav ji bo ku pêvajo bi awayekî saxlemtir û rasttir pêşve biçe bivênevê ne. Hem wekî Meclisa Ciwanan û hem jî wekî Meclisa Jinên Ciwan, me nirxand ka divê em di vê pêvajoyê de çawa pêşve biçin. Di vê çarçoveyê de, em li hev civiyan, planên xwe çêkirin û gihîştin wê encamê ku divê em di qadê de bêtir xuya bibin. Wekî ku Rêber diyar kiriye, divê ciwan di vê pêvajoyê de beşdar bibin."