Platforma Ekolojiyê ya Mûşê, li Şaxa Egîtîm Senê ya Gimgim a Mûşê daxuyaniyek da û avakirina platformê ragihand. Keyayên gundên ku dê ji projeya Santrala Enerjiyê ya Jeotermal (JES) a ku tê payin li gundê Xwarikê ê Gimgimê bikeve meriyetê bandor bibin jî tev li daxuyaniyê bûn. Endamê platformê Alî Riza Vural avakirina platformê ragihand. 

 

Vural, anî ziman ku wan ji bo parastina xaka welatiyên Mûşê platform ava kirine û got: “Platforma me, mirovan ne xwediyê xwezayê lê parçeyeke wê dibîne. Her wiha hilweşîna ekolojîk ne tenê pirsgirêkeke hawîrdorî ye lê di heman demê de pirsgirêkeke ekolojiya civakî dibîne. Di vê çarçoveyê de; her talana li dijî xwezayê, di heman demê de li dijî civak, çand û pêşerojê ye. Em ê li dijî projeyên madenan ên li Mûş û derdora wê zêde dibin, qirêjîkirina avan, îmara bêkontrol û texrîbkirina curbicuriya biyolojîk bêdeng nemînin. Li dijî fedakirina qadên me yên jiyanê ya ji bo sermayeyê, em ê xeteke têkoşînê ya demokratîk, beşdar û şefaf ava bikin.” 

 

BANGA TÊKOŞÎNA HEVPAR  

 

Vural, anî ziman ku ji bo li vê xakê av bi awayekî azad biherikin, daristan şîn bibin, çêregeh zindî bimînin û ji bo nifşên pêşerojê di hawîrdoreke bitendurist de bijîn, banga têkoşîna hevpar li gelê Mûşê kir û got: “Parastina jiyanê, parastina pêşerojê ye.”