Komîsyona Meclisê ya bi boneya çareseriya demokratîk a pirsgirêka Kurd hatiye avakirin, di 18’ê Sibatê de civîna xwe ya 21’an û ya dawî li dar xist û rapora hevpar bi piraniya dengan qebûl kir. “Mafê hêviyê” di raporê de cih negirt lê hate gotin ku divê biryarên Dadgeha Mafên Mirovan a Ewropayê (DMME) bên bicihanîn. Wezîrê Dadê Akin Gurlek jî têkildarî geşedanên di rojevê de axivî û got ku di vê mijarê de raye, ya Meclisê ye. 

 

Gurlek, diyar kir ku di mewzûatên hiqûqa Tirkiyeyê de kesên cezayê muebbedê lê hatiye birîn jî di nav de, dema kesek heta demekî di girtîgehê de, derfet hene ku bi şert were berdan. Gurlek, got: “Lêbelê sûcên terorê li derveyî vê hatine hiştin. Bi taybet jî kesên cezayê wan ê îdamê veguherandin cezayê muebbeda girankirî yan jî yên ji ber sûcê terorê cezayê muebbeda girankirî lê hatiye birîn, nikarin ji vê mewzûatê sûd bigirin. Cezayê xwe heta mirinê dikişînin.” 

 

Di berdewamê de Gurlek bal kişand ser “Mafê hêviyê” û got: “Lewma jî di pergala hiqûqê de ji bo van kesan ji xwe ‘mafê hêviyê’ tune ye. Heke di vê mijarê de sererastkirineke zagonî were kirin jî, ev raye ya TBMM’ê ye. Pêvajoa dê li wir teşe bigire. Divê em di vê mijarê de hewceye em xebatên verastkirinan ên ji bo şexsan lêbelê yên ji pêdiviyên civakê re dibin bersiv bikin. Di halê hazir kesên cezayê wan ê îdamê veguherandin cezayê muebbeda girankirî yan jî yên ji ber sûcê terorê cezayê muebbeda girankirî lê hatiye birîn, dê nekarin ji derfeta berdana bişert sûdê bigirin.”