Welatiyê bi navê Hurmuz Dîrîl (71) û hevjîna wî Şîmonî Dîrîl (65), di 11’ê Çileya sala 2020’ê de li gundê Mehrî yê navçeya Elkê ya Şirnexê winda bûn. Cenazeyê Şîmon Dîrîlê, piştî 70 roj piştre hezar û 500 metreyan dûrî mala wan, di rûbarê Hêzilê de hate dîtin. Lêbelê heta niha jî aqûbeta Hurmuz Dîrîl nayê zanîn. Têkildarî mirina Şîmonî Dîrîlê, li Apro Dîrîl, Behçet Oztunç û Îsmaîl Yildiz bi sûcên “Bi hesta cinawirî û bi îşkenceyê kuştiye” û “Bi plan kuştine” doz hate vekirin. Dadgehê, di 21’ê Tîrmeha 2023’yan de ji ber her du sûcan cezayê muebbedê da Apro Dîrîl û ji bo Behçet Oztunç û Îsmaîl Yildiz jî biryara beraetê da. Dozgeriyê, têkildarî Hurmuz Dîrîl ê ku 6 sal û 2 meh in tu agahî jê nayên girtin, îdianameyeke cuda amade kir. Di îdianameyê de Apro Dîrîl, Behçet Oztunç û Îsmaîl Yildiz ji sûcê “Kuştina biqesdî” weke gumanbar tê de cih digirin. 

 

Dozgeriyê, di îdianameyê de destnîşan kir ku Apro Dîrîl, Behçet Oztunç û Îsmaîl Yildiz bi hev re Hurmuz û Şîmonî Dîrîl kuştine û ev nirxandin kir: “Tevî xebatên berfireh ên di navbera salên 2020-2025’an de jî Hurmuz Dîrîl an jî cenazeyê wî nehatiye dîtin. Di encama xebatan de tu nîşaneyeke ku Hurmuz dijî nehatiye dîtin. Di encama delîlên hatine bidestxistin de, em gihiştin wê qenaetê ku Hurmuz Dîrîl jî wekî hevjîna xwe Şîmonî Dîrîl hatiye kuştin.” Dozgeriyê xwest ku gumanbar cuda cuda bên cezakirin. 

 

Îdianame, ji hêla 1’emîn Dadgeha Cezayên Giran a Şirnexê ve hate qebûlkirin. Danişîna ewil a dozê dê sibe saet di 09.15’ê de li 1’emîn Dadgeha Cezayên Giran a Şirnexê bê lidarxistin.