Dogrudemîr piştî 30 salan hate berdan: Em ê ji banga Ocalan re bibin bersiv 2025-08-29 14:53:35 ÎZMÎR - Mahfûz Dogrudemîr ku piştî 30 salan ji girtîgehê hate berdan, got: “Em ê berpirsyartiya xwe ya di pêvajoya nû de bi cih bînin. Em ê ji banga Rêbertiyê re bibin bersiv.”    Mahfûz Dogrudemîr ku li Girtîgeha Hejmar 4 a Tîpa T a Şakran Alîaga ya Îzmîrê dihat ragirtin, piştî 30 salan hate berdan. Dogrudemîr, ji hêla endamên malbata xwe, Komeleya Alîkarî û Piştevaniya bi Malbatên Girtî û Hikûmxwaran re ya Egeyê (EGE-TUHAYDER) û rêveberên Partiya Wekhevî û Demokrasiyê ya Gelan (DEM Partî) ve hate pêşwazîkirin.    Dogrudemîr, di pêşwazîkirinê de axivî û got: “Ev 30 sal in em di girtîgehê de bûn. Em nikarin bibêjin bi temamî azad bûne. Berdêleke mezin ji bo azadiyê hatiye dayîn. Li hemberî têkoşîna 42 salan, 30 sal helbet nabe bersiv. Têkoşîna ku di 15’ê Tebaxê de dest pê kiribû heta niha bû 42 sal. Ger em şev û roj bixebitin em ê karibin bibin bersiv. Pêvajoya ku bi keda Rêbertiyê di nava çar dîwaran de dest pê kirî niha didome. Heta Rêberê me û havalên me yên li nava çar dîwaran neyê berdan em nikarin qala azadiyê bikin. Dema Rêbertiya me azad bû û gelê me bû yek em ê karibin qala azadiyê bikin. Ji bo pêvajoya nû, em amade ne berpirsyartiya xwe bi cih bînin. Ez îro li derve me lê çavên min pişt min li hevalê min ê di hundir de ne. Lewma em nikarin bi derketina derve kêfxweş bin. Tiştên ku ji me tên xwestin ew e ku em ê bi xebatên xwe bibin bersiv ji bo berxwadana hevalan. Em ê xwe li gorî pêvajoya nû amade bikin û bibin bersiv ji bo banga Rêbertiyê. Hêvîdar im ku em di warekî azad de hev bibinin.”     MAHFÛZ DOGRUDEMÎR KÎ YE?     Dogrudemîr, di sala 1996’an de li Mêrsînê hate girtin. Li Dadgeha Ewlekariyê ya Dewletê (DGM) hate darizandin û bi îdiaya “Xerakirina yekitî û yekparetiya dewletê” cezayê muebbedê lê ahte birîn. Li girtîgehên Mêrsîn, Edene, Konya, Amed, Mêrdîn û Îzmîrê hate ragirtin. Nexweşiyên Dogrudemîr ên weke epîlepsî, KOAH, bêhnkurt, reflû, prostat, xitimîna demaran û nexweşiya pişikê pê re hene.