Tevgera Jinên Azad (TJA) ji Amedê ber bi Enqereyê ve bi dirûşma “Em bi hêvî ber bi azadiyê ve dimeşin” meş da destpêkirin û meş gihişt navçeya Xelfetî ya Rihayê. Meşvanên ku di saetên serê sibehê de bernameya xwe ya li Curnê Reş emam kirin û dest bi meşê kirin, li Parka 4’ê Nîsanê ya li navenda Xelfetiyê ji hêla bi sedan jinan ve hatin pêşwazîkirin. Meşvan, bi posterên Rêberê Gelê Kurd Abdullah Ocalan û bi dirûşmên “Bijî Serok Apo” û "Mafê heviyê mafê gelan e” hatin pêşwazîkirin. 

 

JI LEYLA GUVENÊ PEYAM  

 

Piştre jî girseyê tevî meşvanan govend gerand. Di daxuyaniya li vir de ji ewil peyama siyasetmedara Kurd Leyla Guven şandî hate xwendin. 

 

Peyama Leyla Guvenê wiha ye: 

 

“Jinên delal…  Têkoşîna me li dijî zîhniyeta serdest ku hewl dide pêşeroj û hêviyên gelê me bidize, bi hebûna me dest pê kir. Jin dizanin ku zîhniyeta serdest ne çarenûsa tu civakê ye. Ji ber vê yekê ew hewl didin ku jinan tecrîd bikin û di her fersendê de ji jiyanê qut bikin da ku ev rastî neyê naskirin. Tevî hemî polîtîkayên zordar ên pergala serdest, em di girtîgehan û di her aliyê jiyanê de difikirin, hildiberînin, dinivîsin û xêz dikin. Qîrîna 'Jin jiyan azadî' ku dev bi dev, welat bi welat û li her meydanek giştî tê bihîstin mînaka herî berbiçav e. Divê ew bizanin ku jin mîna kevirên di çem de ne. Ew bi hêsanî nayên tunekirin.

 

Her çend laşên me dîlgirtî bin jî, dilên me dê bi we re bin. Hûn li ser wan rêyan in wekî neviyên hemî jinên ku li wan axan dijîn, Kurd, Asûrî, Suryanî, Ermenî, Tirkmen. Em meşa we bi giyanek hevaltiya komunal a li ser bingeha hesasiyeta jinan a ji bo 'Banga ji bo Pêvajoya Aştî û Civaka Demokratîk' a fîlozofê serdema me, rêberê gelan, Birêz Abdullah Ocalan, silav dikin. Azadiya rêbertiya me, ya ku got 'civak bêyî azadiya jinan, azad nabe' û şoreşa jinan a yekem a cîhanê pêk anî, xeta me ya sor e. Rewşa wî wekî danûstandinkarê sereke jî azadiya wî hewce dike. Di ronahiya azadiya rêbertiya me de, em jin niha rê û çarenûsa xwe diyar dikin. Hezar silav ji hevalên ku di vê rêyê de bûne stêrk.”

 

'OCALAN BI BERXWEDANA XWE DÎWAR TUNE KIR’ 

 

Piştre jî Hevseroka Giştî ya DBP’ê Çîgdem Kiliçgun Uçar axivî. Çîgdem Kiliçgun Uçarê got ku meşa jinên Kurd tu caran xelas nebûye û got: “Mînaka herî mezin a neçareserkirina pirsgirêka Kurd û bêtehemûliya li dijî Kurdan Îmrali ye. Li Girtîgeha Îmraliyê bi awayekî fîzîkî dîwar hene lê ev dîwar bi berxwedana birêz Ocalan hatine tunekirin.”

 

'OCALAN TIŞTA PÊWÎST KIR’

 

Çîgdem Kiliçgun Uçarê bal kişand ser “Mafê hêviyê” û biryarên DMME’yê û got: “Nêzî saleke pêvajoyek heye. Di vê pêvajoyê de birêz Ocalan tişta pêwîst kir. Ji bo aştiyê tişta ji dest kir. Tevgera Azadiyê ya Kurd çekên xwe şewitand. Lê dewletê heta niha tiştek nekiriye. Komîsyona li Meclisê hema hema li her kesî guhdarî kir lê li aktorê sereke yê pêvajoyê, li birêz Ocalan guhdarî nekir.Divê komîsyon teqez li birêz Ocalan guhdarî bike.”

 

'HETA KU AZAD DIBE EM Ê BIMEŞIN’ 

 

Çîgdem Kiliçgun Uçarê anî ziman ku divê Meclis gavên bi wêrek biavêje û axaftina xwe wiha qedand: “Kurd dixwazin bi rêbertiya xwe bimeşin. Heta ku birêz Ocalan azad dibe dê meşa me jî bidome.” 

 

Piştre jî jin ber bi avahiya DEM Partiyê ya navçeyê ve meşiyan.