WAN - Ji parêzerên doza Rojîn Kabaîşê Zeynep Demîrê diyar kir ku divê hemû delîl bi awayekî yekpare ji nû ve werin nirxandin û got: "Vekirina telefona Rojînê xaleke girîng e ji bo ronîkirina dosyeyê." 

 

Mirina biguman a xwendekara pola yekem a Zanîngeha Yuzuncu Yil a Wanê Rojîn Kabaîşê û dosyaya lêpirsînê hîn jî yek ji rojevên sereke ye. Neeşkerekirina nimûneyên DNA'yê yên du zilamên ku di rapora Saziya Tiba Edlî (ATK) de hatin tespîtkirin û binpêkirinên di lêpirsînê de li bara civakê bûne sedema nerazîbûnan. 

 

Ji parêzerên dosyeya Rojîn Kabaîşê Zeynep Demîrê qonaxa dawî ya dosyeyê nirxand.

 

GILIYÊ DER BARÊ ATK'Ê DE

 

Zeynep Demîrê diyar kir ku ji roja yekem a windabûna Rojîn Kabaîşê ve îhmalkarî hebûye û got: "Me gelek caran diyar kir ku ji roja yekem ve di dosyeya lêpirsînê de îhmalkarî hene. Me di raporê de tespît kir ku pêvajo dereng maye, îhtîmala êrişa zayendî ji bo jineke ku di şert û mercên gumanbar de miriye nehatiye nirxandin û nimûneyên DNA'yê yên hatine tespîtkirin bi raya giştî an parêzeran re nehatine parvekirin."

 

Zeynep Demîrê diyar kir ku ATK di dosyeya Rojîn Kabaîşê de "îhmalkarî û îstismarkirina erkê" kiriye û wan giliyê wê kiriye û got: "Wê rapora di dest xwe de di 10'ê Cotmehê de radestî me kir. Ji ber vê yekê, ev îhmalkarî bûye sedema wê encamê ku Saziya Tiba Edlî bi giranî erkê xwe paşguh kiriye û ev îhmalkarî di sala borî de bûye sedema zirara gelek delîlan û dibe ku piraniya wan niha winda bûbin jî. Di rewşên wiha de, Saziya Tiba Edlî divê pêvajoyê ji destpêkê ve bi baldarî bi rê ve bibe, piştrast bike ku ew erkê xwe paşguh nake."

 

ÎXTÎMALA ÊRIŞA ZAYENDÎ

 

Zeynep Demîrê destnîşan kir ku îhtîmala êrişa cinsî di dosyeya Rojîn Kabaîşê de, wekî gelek mirinên gumanbar ên jinan, zêde ye. Zeynep Demîrê diyar kir ku hem Saziya Tiba Edlî û hem jî dozger divê binirxînin ka gelo Rojîn Kabaîş rastî êrişa zayendî hatiye yan na. Zeynep Demîrê destnîşan kir ku divê hemû delîlên heyî yên di dosyeyê de di vê qonaxê de ji nû ve werin nirxandin û got: "Di vê gavê de, me daxwaza xwe ya 'lêpirsîna berfireh' pêşkêşî dosyeyê kiriye. Em her wiha hevdîtinên xwe yên pêwîst ên der barê rapora tiba edlî de didomînin. Pêvajo her wiha berdewam dike da ku were destnîşankirin ka dê çi lêpirsîn werin kirin da ku DNA'ya ji di laşê Rojînê de hat tespîtkirin were destnîşankirin. Ji ber vê yekê, divê ev pêvajo bi baldarî bidome." 

 

‘DIVÊ BIRYARA NEPENÎTIYÊ BÊ RAKIRIN'

 

Zeynep Demîrê diyar kir ku divê biryara nepenîtiyê ya li ser dosyeyê bê rakirin û îhmalkarî bên lêkolînkirin. Zeynep Demîrê destnîşan kir ku pêdivî bi şopandineke berfireh heye û wiha got: "Di rewşa heyî de, hê jî telefona Rojînê nehatiye vekirin, ji ber vê yekê tu biryarek nehatiye dayîn. Daxuyaniya Wezîrê Dadê diyar kir ku piştgiriya teknîkî dê ji derveyî welêt were wergirtin. Lêbelê, ev ceribandina teknîkî diviyabû ji roja yekem ve bihata kirin. Hiştina vekirina telefonê ji bo salekê, xetera zirara digihê daneyan diafirîne. Di destpêkê de, pêdivî bû ku teknîkên navxweyî û navneteweyî bihatana nirxandin."

 

Zeynep Demîrê anî ziman ku vekirina telefonê ji bo zelalkirina dosyeyê pir girîng e û got ku pêdivî ye ku dane demildest bên tespîtkirin. Zeynep Demîrê destnîşan kir ku dosye ji hêla rêxistinên civaka sivîl û baroyên Amed û Wanê ve bi baldarî tê şopandin û got: "Raya giştî jî hewleke cidî dide ku dosye demildest bê ronîkirin. Divê dosyeya Rojînê û yên hemû jinên ku di şert û mercên gumanbar de mirine bi baldarî werin zelalkirin. Ji ber vê yekê, em ê hemû hewl û têkoşîna xwe bidomînin da ku dosye bi baldarî bê zelalkirin."

 

NAKOKIYÊN DI RAPORÊN ATK'Ê DE

 

Zeynep Demîrê bal kişand ser nakokiyên di raporên ATK'ê de û got: "Wê daxuyaniyên ku nakokiyên cidî di hundirê xwe de hewandine dane. ATK'ê di raporan de jî nakokiyeke bi vî rengî pêşkêş kir. Ji ber vê yekê, divê ew vê yekê zelal bike. Piştî ku îhtîmala belavbûna DNA'ya heyî destnîşan kir, ew li ser çi bingehê hîn jî îhtîmala belavbûnê dibêje? Her wiha divê ew raporekê pêşkêş bike ku zelal bike ka xetera belavbûnê hîn jî li cihên ku DNA lê hatiye dîtin heye yan na. Ev encam nakokiyeke ku hîn nehatiye zelalkirin eşkere dike. Em nîqaşên xwe bi pisporan re der barê van mijaran de didomînin û em daxwazên xwe li gorî wê pêşkêşî dosyeyê dikin."

 

Zeynep Demîrê destnîşan kir ku li bajêr di meh û nîvekê de 13 jin bi awayekî biguman jiyana xwe ji dest dane û got ku divê dewlet li gor divêtiyên xwe pêvajoya lêpirsîna çalak û mekanîzmayên pêşîlêgir bixebitîne. Zeynep Demîrê bilêv kir ku divê raya giştî wekî dosyeya Rojîn Kabaîşê li dijîv van mirinan bitêkoşe û got ku heya kiryar neyên darizandin û mirinên biguman neyên ronîkirin ew ê bitêkoşin.

 

MA / Ozlem Yacan