Peymana ku ji 8 xalan pêk hatî di navbera Hêzên Sûriya Demokratîk û rêveberiya demî ya Şamê de di 10'ê Adarê de wek serdemek nû li Sûriyeyê hate binavkirin. Di peymanê de xala; "Misogerkirina vegera hemû Sûriyeyiyên koçberbûyî li bajar û gundên xwe û misogerkirina parastina wan ji aliyê dewleta Sûriyê ve" cih digire û ev ji bo gelê Efrîn, Girê Spî û Serêkaniyê ku erdên wan hatine dagirkirin bû hêviyek mezin.

 

Efrîn ku sala 2018 'an kete destê Tirkiyeyê û hêzên paramîlîter, ji wê demê û vir ve bi gelek sûcên li dijî mirovahiyê yên weke komkujî, talan, revandin û destavêtinê kete rojevê. Gelê Efrînê, Girê Spî û Serêkaniyê yên neçar man qadên xwe yên jiyanê biterikînin, niha li benda roja ku vegerê ne.

 

KELECANA VEGERÊ

 

Hevserokê Rêxistina Mafên Mirovan a Efrînê Îbrahîm Şêxo diyar kir ku hemû gelên Rêveberiya Xweser bi coşeke mezin lihevhatinê pêşwazî dikin û destnîşan kir ku bi taybet gelên ji warên xwe hatine koçberkirin peyman ê pêşwazî dikin. Şêxo diyar kir ku gelan ji bo vegera wan li benda pêngava ku ji aliyê rêveberiyê ve hatiye avêtin e.

 

DÊ KOMÎTEYEK  BÊ AVAKIRIN

 

Îbrahîm Şêxo wiha got: "Em nizanin rewşa amadekariyan çi ye. Em dizanin ku ji bo vê yekê wê komîteyek bê avakirin. Li gorî ku me bihîst, Tirkiye û hêzên wê yên dagirker li Efrînê û komên çekdar ên girêdayî rejîma heyî ya Şamê civînek li dar xistin. Di vê civînê de du mijar hatin zelalkirin. Yek jî ew e ku komên paramîlîter ên Tirk girêdayî Artêşa Sûriyeyê ne. Ya din jî vekişandina komên çekdar ji herêmên sivîl ku gund û navenda bajêr jî di nav de ne. Çalakiyên van koman li herêma Efrînê hê jî dewam dikin. Mijarên ku nehatine zelalkirin hene. Tirkiyeyê gavên pêwîst neavêt, lê belê amadekariyên ji bo vegerê bi hemû leza xwe dewam dikin. Bi peymana nû re berpirsyariyên vê yekê xistin stuyê rejîma nû."

 

'GELÊ EFRÎNÊ BI ÇIYAYÊ KURDAN VE GIRÊDAYÎ YE'

 

İbrahim Şêxo da zanîn ku ji Efrîn, Serêkaniyê û Girê Spî 300 hezar mirov li benda vegera axa xwe ne û wiha dewam kir: "Piştî dagirkirina Til Rifat-Şehba, bi qasî 85-90 hezar gelê Efrînê neçar man ji vir koç bikin. Li gelek cihan bi taybetî li Helebê kesên ji Efrînê hene. Em difikirin ku zêdetirî 300 hezar kes vegerin. Bi mehan e em li benda erêkirina rêziknameya qanûnî ya têkildarî vegerê ne. Ji aliyekî ve em li benda Rêveberiya Xweser man, li aliyê din jî bêguman em li benda pêngavên rêveberiya heyî man. Em niha hem di asta neteweyî hem jî di asta navneteweyî de li benda misogeriyê ne. Di vê wateyê de em dibînin ku gavek hatiye avêtin.

Lê belê em ê di demeke nêz de vê pêvajoyê di warê mafên mirovan û hiqûqî de bişopînin. Divê baş were zanîn ku ne tenê gel ji Efrînê koç kir, Efrîn jî hate talankirin. Em dizanin ku yên piştre li wir bi cih bûne jî dema ji wir derketine malên Kurdan talan kirine. Em dikarin bibêjin ku tenê dîwarên di malên Kurdên Efrînê de mane, wê îro li wan vegerin. Mafê her mirovî heye ku li ser axa xwe bijî. Gelê Efrînê mîna kokên darên zeytûnê bi çiyayên Kurdan ve girêdayî ye. Her wiha em hêvî dikin ku Newroza 2025'an bi banga Rêberê Gelê Kurd Abdullah Ocalan bibe Newroza azadiyê. "

 

MA / Ceylan Şahînlî