NAVENDA NÛÇEYAN - Sekreterê Giştî yê NY’ê Antonio Guterres, diyar kir ku operasyona bejahî ya Îsraîlê ya li dijî Xezeyê derbasî “qonaxeke xetere” bûye. Rêveberê Bernameya Xurekê ya Cîhanê jî ji bo rewşa Xezeyê got: “Birçîtiya li vir rastî ye.”
Êrişên Îsraîlê yên li ser Xezeyê berdewam in. Neteweyên Yekbûyî (NY) li dijî Îsraîlê ku operasyona leşkerî ya bejahî li Xezeyê didomîne, bang kir. Sekreterê Giştî yê NY’ê Antonio Guterres, li ser hesabê xwe ya platforma X’ê fikara xwe ya ji zêdebûna windahiyên canî ya li Xezeyê anî ziman û got: “Îsraîlê inyeta xwe ya ji bo dagirkirina Xezeyê aşkera kir û ev jî nîşaneya qonaxeke xetere ye. Bi sedhezaran sivîl dê careke din neçar bimînin ku birevin. Ev jî dê xetereyeke mezin li ser wan çêbike. Divê ev bi dawî bibe. Pirsgirêk, bi rêyên leşkerî çareser nabe.”
Guterres, wiha domand: “Mînaka asta windahiyên canî û wêraniya li Xezeyê nînin. Xeze, wêran bûye û bi mînakên binpêkirina hiqûqa navneteweyî tije ye. Pêdiviya me tavilê bi agirbesteke mayinde heye.” Guterres, bal kişand ser dîlgirtiyên di destê Hamasê de û got: “Divê dîlgirtî tavilê bên berdan û ev miameleya bêrehm were bidawîkirin.” Guterres, got ku di mijara alîkariya xurek, av, derman û pêdiviyên sereke de berpirsyartiyeke aşkera ya Îsraîlê heye.
‘BIRÇÎTIYA LI XEZEYÊ RAST E’
Dîrektorê Bernameya Xurek a Cîhanê (WFP) ku girêdayî NY’ê ye Cindy McCain jî da zanîn ku çûye serdana Xezeyê û çavdêriyên xwe wiha vegot: “Aşkera ye ku li Xezeyê xwarin tune ye. Birçîtiya li Xezeyê iddome. Min dayik û zarokên birçî bi xwe re hevdîtin kir. Ev, rastî ye û niha tê jiyîn. Ji ber rewşa li Xezeyê bi Netanyahu re axivîm. Wî jî got ku ji ber mirov xwarinê peyda nakin, gelek ‘bifikar e.’ Me li hev kir ku alîkariyên mirovî zêdetir biçin Xezeyê. Têketina konvoyên me û ewlehiya wan mijareke krîtîk e.”